HeartGuard: Заштита на животите на младите спортисти во Македонија
Проектот HeartGuard, инициран од Фондацијата Марко Божиновски, е емотивен проект посветен на превенција од трагичните и ненадејни загуби на животите на младите спортисти поради проблеми со срцето. Проектот има за цел да собире средства за да се обезбедат срцеви монитори за младите спортисти во Македонија, кои би помогнале при рано идентификување на потенцијални срцеви проблеми како и навремена превенција на истите.
Фондацијата е основана во чест на Марко Божиновски, талентиран спортист кој почина од ненадеен срцев застој во 2021 година. Болката поради неговата загуба ги инспирираше неговите родители, Ристе и Александра Божиновски, да преземат иницијатива за заштитата на здравјето и животите на другите млади спортисти во земјата.
Проблем:
Во последните години, во регионот па и кај нас во Македонија се бележи алармантно зголемување на бројот на млади спортисти кои починале од срцеви удари, а навидум сите тие се без никакви претходни здравствени проблеми. Овие неочекувани загуби остануваат длабока трага во животите на нивните семејства, другари, колеги, заедницата како и спортскиот свет.
Често се вели, дека сите овие спортисти пред да се случи трагедијата, биле во најдобра животна форма, во добра физичка состојба и максимално посветени на своите спортови. Отсуството на било какви очигледни предупредувачки знаци ги прави овие трагедии уште поголеми и од таа причина сметаме дека ни треба итна реакција и превенција од понатамошни загуби на млади животи.
Решение: Срцеви монитори за млади спортисти
За да се адресира овој критичен проблем, проектот HeartGuard има за цел да ги опреми клубовите со срцеви монитори кои ќе ги користат играчите, познати како електрокардиограм (ЕКГ) уреди. Овие монитори можат да детектираат неправилности во срцевите ритмови и да обезбедат рани предупредувања за потенцијални срцеви проблеми. Со редовно мониторирање на здравјето на срцето на спортистите за време на нивните тренинзи и натпревари, би можеле навремено да се детектираат било какви абнормалности и брзо да се интервенира, а со тоа да спречиме ненадејни срцеви проблеми и трагичен исход од ненавремена реакција.
Нашата цел:
- Собирање средства: Обезбедување средства за купување и фер распределба на срцеви монитори за младите спортисти низ Македонија.
- Создавање свест: Подигнување на свеста меѓу спортистите, тренерите, родителите и спортската заедница за важноста на мониторирањето на здравјето на срцето кај младите спортисти.
- Соработка: Соработка со медицински професионалци и експерти во областа за да се обезбеди точна и навремена анализа на ЕКГ податоците.
- Партнерства: Воспоставување партнерства со спортски клубови, организации и владини тела за имплементација на програми за здравје на срцето во спортските институции.
- Едукација: Обезбедување едукативни ресурси за препознавање на симптомите поврзани со срцето и соодветни мерки кои треба да се преземат во случај наитност.
- Негување на споменот на Марко: Сеќавање на Марко и на сите други млади спортисти кои го загубија својот живот поради срцеви но и многу другиздравствени проблеми и превенција на идни трагедии
Проектот HeartGuard не е само проект со кој би се спасиле многу млади животи, тоа е почит и сеќавање на Марко Божиновски, а трагедијата наметна обврска на неговите родители, Ристе и Александра, да спречат други семејства да ја почувствуваат неиздржливата болка од губење на дете од ненадеен срцев удар.
Поддржувајќи ја оваа иницијатива, донаторите ќе придонесат кон идејата за превенција и грижа за здравјето на идните спортисти во Македонија. Заедно, можеме да направиме разлика и да осигуриме дека младите спортисти можат безбедно и сигурно да ги следат своите соништа, знаејќи дека нивното срцево здравје ќе им послужи полесно да стигнат до целта која си ја зацртале да ја достигнат.
